د. فرغلى هارون
المدير العـام
 عدد الرسائل : 3278
تاريخ التسجيل : 07/05/2008
 | | موضوع: من روائع عمنا صلاح جاهين 30/4/2010, 5:46 pm | |
|
من روائع عمنا صلاح جاهين اتكلموا.. اتكلموا.. اتكلموا
محلا الكلام، ما ألزمه، وما أعظمه
فى البدء كانت كلمة الرب الاله
خلقت حياه والخلق منها اتعلموا
فإتكلموا
الكلمة ايد الكلمة رجل الكلمة باب
الكلمة لمبة كهربية فى الضباب
الكلمة كوبرى صلب فوق بحر العباب
الجن ياأحباب مايقدر يهدمه
فاتكلموا لا تجبر الانسان ولا تخـيره
يكفيه ما فيه من عقل بيحيـره
اللي النهارده يطلبه ويرضاه
هو اللي بكره ح يشتهي يغيــره
عجبي عيني رأت مولود علي كتف أمـه
يصرخ تهنن فيه يصرخ تضــمه
يصرخ تقول يا بني ما تنطق كــلام
ده اللي ما يتكلمش يا كتر همـه
عجبي يا عندليب ما تخافش من غنوتك
قول شكوتك واحكي علي بلوتك
الغنوه مش ح تموتك إنمـا
كتم الغنا هو اللي ح يموتــك
عجبي أنا قلت كلمة و كان لها معنييـــن
كما بطن واحده و توأمين زي وشين
لو دنيا شر.. التوأم الخير يمــوت
ولو دنيا خير .. الشر ح يعيش مــنين
عجبي يأسك وصبرك بين إيديك وانت حر
تيأس ما تيأس الحياه راح تـــمر
أنا دقت من ده ومن ده .. عجبي
لقيــت الصبر مُر وبرضك اليـأس مُـــر
عجبي أنا شاب لكن عمري ولا ألف عام
وحيد ولكن بين ضلوعي زحام
خايف ولكن خوفي مني أنا
أخرس ولكن قلبي مليان كلام
عجبي حاسب من الأحزان وحاســب لها
حاسب علي رقابيك من حبلــها
راح تنتهي ولابد راح تنتهــي
مش انتهت أحزان من قبلهـا؟
عجبي خوض معركتها زي جدك ما خـاض
صالب وقالب شفتك بامتـعاض
هي كده...ما تنولش منها الأمــل
غير بعض صد ورد واوجاع مخاض
عجبي يا طير يا عالي في السـما طظ فيك
ما تفتكرشي ربنا مصطــفيك
برضــك بتاكل دود وللطين تعود
تمـــص فيه يا حلو .. ويمص فيك
عجبي ولدي إليك بدل البالون ميت بالـون
انفخ وطرقع فيه علي كل لــون
عساك تشوف بعنيك مصيرالرجـــال
المنفوخين في السترة والبنطلــون
عجبي ولدي نصحتك لما صوتي اتنبــح
ما تخفش من جني ولا من شبـــح
وان هب فيك عفريت قتيل إسألـــه
ما دافعش ليه عن نفسه يوم ما اندبح
عجبي يا ميت ندامه ع القلوب الخـلا
لا محبة فيها و لا كراهــه ولا
حتي يا قلبي الحزن ما عادش فيـــك
معلهش .. لك يوم برضه راح تتملا
عجبي يا باب أيا مقفول ... إمتي الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول
عجبي ليه يا حبيبتي ما بيننا دايما سفر
ده البعد ذنب كبير لا يغتفر
ليه يا حبيبتي ما بيننا دايما بحور
أعدي بحر ألاقي غيره اتحفر
عجبي نوح راح لحاله والطوفان استمر
مركبنا تايهه لسه مش لاقيه بَـر
آه م الطوفان وآهين يا بَـر الأمان
إزاي تبان و الدنيا غرقانه شر
عجبي يا قرص شمس ما لهش قبة سما
يا ورد من غير أرض شب ونما
يا أي معني جميل سمعنا عليه
الخلق ليه عايشين حياه مؤلمة
عجبي إقلع غماك يا تور وارفض تلف
إكسر تروس الساقية واشتم وتف
قال : بس خطوة كمان .. وخطوة كمان
يا اوصل نهاية السكة يا البير تجف
عجبي يا حزين يا قمقم تحت بحر الضياع
حزين أنا زيك و إيه مستطاع
الحزن ما بقالهوش جلال يا جدع
الحزن زي البرد ... زي الصداع
عجبي إنسان أيا إنسان ما أجهلك
ما أتفهك في الكون وما أضألك
شمس وقمر وسدوم وملايين نجوم
وفاكرها يا موهوم مخلوقه لك
عجبي الدنيا أوضه كـبيره للانتظار
فيها ابن أدم زيه زي الحـمار
الهم واحد .. و الملل مشـــترك
و مفيش حمار بيحاول الانتــحار
عجبي أيوب رماه البين بكل العــلل
سبع سنين مرضان وعنده شلل
الصــبر طيب .. صبر أيوب شفاه
بس الأكـــاده مات بفعل الملل
عجبي رقاصه خرسا ورقصه من غير نغــم
دنيا . . يا مين يصالحها قبل النـــدم
ساعتين تهز بوجههـــا يعنـي لأ
يترجرجوا نهديها يعني نعــم
عجبي جالك أوان ووقفت موقف وجـــود
يا تجود بده يا قلبي يا بده تجــــود
ما حد يقدر يبقي علي كل شـــــــئ
مع إن – عجبي – كل شئ موجود
عجبي أنا كنت شئ و صبحت شئ ثم شــئ
شوف ربنا .. قادرعلي كل شـــــــئ
هز الشجر شواشيه ووشوشني قال:
لابد ما يموت شئ عشان يحيا شئ
عجبي تسلم يا غصن الخوخ يا عود الحطــب
بييجي الربيع .. تطلــع زهورك عجب
وانا ليه بيمضــي ربيع وييجي ربيع
ولسه برضك قلـــبي حتة خشب
عجبي دخل الشتا وقفل البيبان ع البـــيوت
وجعل شعاع الشمس خيط عنكبوت
وحاجات كتير بتموت في ليل الشــتا
لكن حاجات أكتر بترفض تمــــــوت
عجبي الدنيا من غير الربيع مــيته
ورقة شجر ضعفــانه ومـفــتـفـته
لا يا جدع غلطان تأمل وشوف
زهر الشتا طالع فـي عز الشـــتا
عجبي ياللي انت بيتك قش مفروش بريش
تقوي عليه الريح .. يصبح ما فيش
عجبي عليك حواليك مخالب كـــــبار
و ما لكش غير منقار و قادر تعيش
عجبي سمعت نقطة ميه جوه المحيـــط
بتقول لنقطه ما تنزليش في الغويط
أخاف عليكي م الغرق .. قلـــت أنا
ده اللي يخاف م الوعد يبقي عبيط
عجبي بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت قالوا مفيش
غير بس هو الحب قارب نجاه
عجبي إنشد يا قلبي غنوتك للجمـال
وارقص في صدري من اليمين للشمال
ما هوش بعيد تفضل لبكره سعيــد
ده كل يوم فيه الف الف احتمــال
عجبي إيديا في جيوبي وقلبي طِــرب
سارح في غربة بس مش مغترب
وحدي لكين ونسان وماشي كده
وبابتعد ما اعرف .. أو باقـــــترب
عجبي فتحت شباكي لشمس الصبـــاح
ما دخلش منه غيـــر عويل الريــاح
وفتحت قلبي عشان ابوح بالألـــم
ما خرجش منه غير محبه وسمـاح
عجبي غمست سنك في السواد يا قلــم
عشان ما تكتب شعر يقطر ألـــم
مالك جرالك إيه يا مجنون ... وليــه
رسمت ورده وبيت وقلب وعلـــم
عجبي لو فيه سلام في الأرض وطمان وأمن
لو كان مفيش ولا فقر ولا خوف جبن
لو يملك الانسان مصير كل شـــئ
انا كنت اجيب للدنيا ميت ألف ابــن
عجبي أنا اللي بالأمر المحال اغتــوي
شفت القمر نطيت لفوق في الهــوا
طلته ما طلتوش إيه انا يهمنـي
وليه .. ما دام بالنشوة قلبي ارتوي
عجبي يا خالق الكون بالحساب والجبر
وخالقني ماشي بالاختيار والجبر
كل اللي حيلتي زمزمية أمـل
وازاي تكفيني لباب القـبر؟
عجبي | |
|
