الثورة قى 10 مشاهد

موضوع: الثورة قى 10 مشاهد 22/5/2011, 1:39 am

[youtube]

[/youtube]

الثورة فى 10 مشاهد
شعر/ د. فرغلى هارون

الثورة قى 10 مشاهد 49085375sl9

المشهد الأول:
ميدان التحرير 25 يناير 2011

بعد ما مُــتنا سنين وسنين ..
فُـقـنا خلاص من غفلتنا
على الميدان كلنا رايحين ..
خارجين وعارفين سكتنا
مسلم مسيحى مصريين ..
حالفين نرجع كرامتنا
خارجين ألوف فى ايديها ألـــوف
واقفين صفوف تسندها صفـوف
انزل معانا وبلاش خـــوف .. نصرخ نوصل كلمتنا
هانقولها و بعلو الإحســاس ..
الشعب مش هايطاطى الراس ..
الشعب يريد الحرية ..
لقمه وعداله اجتماعيه
كمان محاكمة فورية ..
لكل من بيهين إنســان
وكلنا واقفين دادابان ..
جوه الميدان وفى كل ميدان ..
مافيش ما بينا خاين وجبان .. قوتنا هى فى وحدتنا
نهتف سوا وبعلو الصوت ..
علشان نوصل رسالتنا:
الشعب يريد الحرية ..
لقمه وعداله اجتماعيه
ووطن بيحفظ كرامتنا

المشهد الثانى:
اجتماع لرؤوس النظام 26 يناير 2011

شعب إيه ده اللى يريد ..
مش كفايه ان احنا نرضى ..
يبقوا فى بلادنا عبيد !!؟
اكتموا الصرخه فى حلوقهم ..
كتفوهم بالحديد
وإيـــه حقوقهم دى كمان ..
زودوها شويتين !!
سيبهم يسوقوا فى الجنان ..
ويبعبعولهم حبتين
ما هو شعب فى الآخر جبان ..
راح ينكسر من ضربتين !!

المشهد الثالث:
ميدان التحرير وميادين أخرى فى مصر
يوم جمعة الغضب 28 يناير 2011

إحنا الشعب وقلنا نريد ..
لا هيرهبنا رصاص وحديد ..
ولا بنخاف تهديد ووعيد ..
حتى ولو مات منا ألوف ..
فيه ملايين هاتجيلنا جديد
تعلى بسقف مطالب مصر ..
تصرخ صرخة تهز القصر
الشــعب
يــــريـــد
إســـــــقاط
النـــظـــــام
صرخه بتشق السما وسط الزحام
تهز عرش الظلم وجيوش الظلام
تعلن حروفها عَ الملأ ..
الشعب قال من قلبه: لأ ..
رافض حقوقه تنسرق ..
رافض غيطانه تنحرق ..
رافض يسلِّم حلمه لشوية لئام
وسط الميدان الشعب قام ..
يطلب حقوقه باحترام:
عايز العدالة فى دنيتى ..
عايز السلامة فى سكتى ..
عايز أحقق فى الحياه حريتى ..
وعشان ما تكمل فرحتى ..
لا يوم راح أهدى أو أنام ..
إلا أما يسقط النظام
مش هتاف بس وكلام ..
الشعب يريد – بالفعل – إسقاط النظام !!

المشهد الرابع:
اجتماع سرى لأعوان النظام 30 يناير 2011

إيه اللى حاصل فى البلد ؟!
دى ثوره فعلاً ولاَّ إيه ؟!
باين الحكايه هتبقى جد ..
وفى الحاله دى هانعمل ايه ؟!
مفيش قلق ..
كل الفلوس متهربة ..
وقصورنا عاليه مكهربه ..
وحرسنا مين يقدر عليه ؟!
بس إحنا لازم برضه نحمى نفسنا اكتر يا بيه !!
طب نعمل إيه ؟
نبعت شوية بلطجيه .. بالنيابة عننا
يربوا ثوار الميدان .. ويطفشوهم من هنا
حلوه دى ..
وكمان نطلَّع كام بيان عن فتنه دخلت وسطنا !!
وايدين غريبه عننا ..
عمَّاله تدفع للشباب ..
فلوس وكنتاكى وكباب .. عشان يثوروا ضدنا !!
وعشان نأمن نفسنا أكتر كمان ..
مفيش ما يمنع إننا نخطف زياره للميدان ..
دكاكينى يعنى ..
من غير ما نظهر أو نبان
مَسك العصايه م الوسط أحسن ضمان
نتصور ويًّا الثوار ..
ونوريهم إننا أحرار .. ومعاهم جوه التحرير !!
وإن مانفعشى ؟!
على طول نمشى ..
الباسبور فيه التأشيره .. على أول طياره نطير !!

المشهد الخامس:
رأس النظام يستعطف الشعب 1 فبراير 2011

شعبى يا صابر من سنين .. إيه جرالك ؟!
ثورة إيه اللى تغيّر بس حـالك ؟!
مش عيب تخالف أمر ســيدك ؟! ..
ده أنا نويت من خيرى أزيدك !!
وكمان أنا مش زى أبوك ؟! ..
يرضيك فى أخرة عمرى أتبهدل بأيدك ؟!!
مش حرام .. عايز تساوى فى الحقوق راسى براسك ؟!
نسيت قوام .. أفضالى على أهلك وناسك ؟!
تحرمنى ليه أعيش معاك ؟! .. تسقينى ليه من مُر كاسك ؟!
خليك حنون .. واعطف عليَّا أبوس مداســـــك !!!

المشهد السادس:
مؤيدو الرئيس فى ميدان مصطفى محمود
بعد خطاب الاستعطاف

زودوها الناس دوهما ..
ثوره قال دى ولاَّ غُمه ؟!!
العيال دى ازاى بتنسى كل أفضاله عليهم ؟!!
من ساعة الضربة الجوية ..
ولحد البنية التحتية .. عمَّال يداديهم
وكمان طالع يستعطفهم .. كان حقه بجزمه ويديهم
أو حبة جاز ويكونوا وسخين .. يدلقهم ويولَّع فيهم
وإن كان علينا إحنا غيرهم ..
إحنا مش ناكرين جميلك ..
يا كبيرنا وكلنا عايزينك ..
لسه السبوبه ما خلصتشى ..
هانكملها ازاى من غيرك ؟!
ولحد ما يمشوا من التحرير .. قَبَّــضنا عشان نذكر خيرك !!

المشهد السابع:
ميدان التحرير موقعة الجمل 2 فبراير 2011

فى الصبر ضربوا بيه المثل ..
زى الجمل يا شعبنا .. وعزّمنا هو الأمل
هجموا علينا بالبغال ..
دمنا عَ الأرض ســــــال .. واستشهدوا أولاد جُـــمال ..
أبطال .. يخاف الخوف يلامس قلبهم ..
وكسرهم ده شيء محـــــــــــــــــــاااال !!
هربوا البغال راكبين جِــمال ..
والصبر غنى لعزّمنا موال وقال:
واهبين عشانك يا مصر أرواحنا ..
ولغيرك انتى لا يوم جينا ولا رحنــا ..
جوه الميدان واقفين مطارحـــنا ..
إيد واحـــده لا هربنـا ولا خــوفنــا ..
حالفين نجيب فجرك ..
حتى ولو رُحـــــــنا

المشهد الثامن:
إعلان التنحى 11 فبراير 2011

يا ثوار مصر فى ميادينها ..
أو فى بيوتكم .. أينما كنتم ..
أعلن ليكم نبأ هــــــام
قرر ريسنا وملكنا يترك أمر الدولة العام
يعنى هيمشى ..
بعد اللى عملتوه ويــاه
اللى بيهتف .. واللى بيشتم ..
واللى يقل بأدبه معــــاه
بعد ما شافه من قسوتكم ..
بعد ما دوقتوه الآه
قرر ريسنا ومليكنا إنه هايرمى ده كله وراه
يرتاح من قسوة دنياكم .. ويعيش بقى هو فى دنياه
يقفل فيلله عليه وقصوره ..
فى مدينته محدش هايزوره .. ولا يوجع راسكم ويــاه
اهمدوا بقى ..
سابهالكو خلاص
راجل كان مليان إخلاص ..
وابنه المحروس كان بيساعده ..
طفشتوه ..
أهو سابهالكم هو وأبوه .. ارتاحو خلاص !!

المشهد التاسع:
ميدان التحرير بعد إعلان التنحى

معقوله خلاص الهم انزاح ..
معقوله أخيراً سابنا وراح ..
تلاتين سنه قابض على روحنا ..
كان يتعب لو يوم ارتحنا ..
تلاتين سنه واقفين مطرحنا ..
ولا شفناش وياه أفراح
بس خلاص .. كل أمورنا هاتبقى تمام
الشعب
خلاص
أسقط
النظام
دلوقتى يهدا الدم فى عـــــروقـــــنا ..
دلوقتى يروى نسيم الفجر نار شـــوقـــنا ..
دلوقتى يتبسم فى الجنه شـــهدائـــنا ..
دلوقتى شعبك يقدر يا مصر ينـــام

المشهد العاشر والأخير:
مصر تخاطب ثوارها

مبروك عليكم فرحة الحرية ..
بس أنا مقدرش أقول مبروك عليَّا !!
لسـه محتاجـــه تكملوا المشـــوار ..
عايزاكـــوا دايماً تفضـــلوا ثـــوار ..
ثـــورتكو باب اتفتح .. أول خـــيوط النـــور
لســـه بقية البيبان .. لســـه باقيـلكم دور
قطعتـــوا راس الفســـاد .. بس الجسد باقـــى
طهرتـــوا وش البـــلد .. عليــــــكوا بالبـــاقــــــى
ثـــورتكو كانت بـــدايـــه .. خلوها 100 ثــــــوره
ثــــــوره فى تعليمنــا .. تخلق عــقول حــــــــره
ثــــــوره فى مصانعنا .. تغنينا عن بـــره
ثــــــوره فى مزارعنا .. نضمن لنا اللقمه
ثــــــوره فى نفوس الناس تصحى همتهم
ثــــــوره فى كل مجال ..
تبنى بلاد حــــــره
تخـــــلق ولاد حـــــــره ..
تتحــاكى بالثــــــوره ..
ولا تخــتموش الحــكايه ..
احـــــكوها 100 مـــره

الاثنين 16 مايو 2011[/size]

موضوع: رد: الثورة قى 10 مشاهد 11/6/2011, 11:56 am

بارك الله فيكم لكم حزيل الشكر