د. فرغلى هارون
المدير العـام
 عدد الرسائل : 3278
تاريخ التسجيل : 07/05/2008
 | | موضوع: رسالة إلى مصر من شهيد ثورة يناير 3/10/2011, 2:04 pm | |
|
رسالة إلى مصر
من شهيد ثورة يناير
شعر/ فرغلى هارون حقك عليا يا مصر
كان نفسى أجيبلك نصر ..
واكمل الثورة
بس انتى عارفه يا مصر
أنا مُت برصاص غدر
بإيدين ولاد هرمه .. لأهلهم خاينين
حقك عليا يا مصر
******
حقك عليا أنا .. ولَّا على الخاينين
من باعو ثورتنا ..
وداسو كرامتنا ..
وقفلو باب الأمل ..
على فجر لسه جنين
حقك وحقى أنا .. فى رقبة الخاينين
******
استكترو الفرحة على شعب عمره حزين
تلاتين سنه عايش مكوى على الجنبين
الصبر منه نفد .. قام ثار على الظالمين
فَتَّح عيون الناس .. صحى موات ملايين
طلعو على التحرير .. فاردين قلوع الأمل
رفضو نعيم الكلام .. واختارو عزم العمل
دقو بيبان الكرامة .. بإيدين ما تعرف كلل
حالفين على الحرية .. وعَ الخلاص ناويين
حقك وحقى أنا .. فى رقبة الخاينين
******
استكترو خيرك يرجع لأصحابه
وكل خاين طلع .. سانن لنا نابه
ينهش فى ثوارك ..
ويخوِّن الأحرار
بعد أما قلنا خلاص .. الشمس راح تطلع
بعد أما قلنا الحق .. بالشعب راح يرجع
جُم كتفوا الثوار ..
وكممو الأحرار ..
وضلمو أنوار .. بدأت يا دوب تسطع
وفجرنا الطالع ..
قفلو عليه بابه بإيديهم الآثمين
حقك وحقى أنا .. فى رقبة الخاينين
******
بس عارفه يا أبيَّه ..
عقول شبابك لسه حيَّه ..
ثورتك لسه عَفيَّه .. وفى ازدياد
لسه نار الثورة قايده فى البلاد
لسه أحرارك مايئسوش م الجهاد
وقلوب شباب متعلقه برب العباد
مؤمنه بحبك .. وحقك فى الميلاد
حالفه تقضى عَ الظلام ..
وتكسَّر الظلم اللى ساد
تمحى الخيانة والفساد
تهديكى توب أبيض بدال توب الحداد
وأيدين شباب واعيه .. جايه وفى الميعاد
تفتح بيبان الأمل ..
للشعب على بُكره
تهتف بصوت واحد:
حقك علينا يا مصر
جايين نجبلك نصر .. ونرجع الأمجاد
حقك وحقى أنا ..
بكره هايرجع لنا ..
بإيدين أجمل ولاد
الأربعاء
28 سبتمبر 2011 م
30 شوال 1432 هـ
الثانية صباحاً
| |
|
